|
La pallabra guerra ta en toles boques y en tolos güeyos. Seis lletres
d’odiu ensin términu clavaes nel cerebru de tolos homes.
Y los periódicos de toles llingües y de tolos pueblos anunciando, con
tanta frialdá qu’abluca, lo que se nos vien enriba. ¡La guerra tócase
coles manes!
Como una nube prieta y grandona. Como una tambascada de fierro y fuéu,
como una llocura universal ensin precedentes, como una fiebre de fame y
dolor, la guerra arrímase a nos.
Y too eso, ¿por qué? Porque a un Atila de frac y sombreru de copa alta
péta-y unviar a la muerte a milenta hermanos. ¿Por qué xugáis asina
dende la calma bona de vuesos despachos cola vida de los homes, cola paz
qu’otros ganaron sudando llárimes?
¡En pie, sollertes, que la guerra llega! Nun vos dexéis engatusar por
falses pallabres nin por cantares babayos. ¡El vuesu himnu ye la paz! La
paz nun tien llendes.
Dicii que non. Toos quietos. Y la guerra nun llegará, nun podrá llegar
enxamás. Diciivoslo unos a otros: Yo nun voi dir a la guerra. Y cuando
t’apurran l’arma asesina, fráyala, desfaila.
|
Namái qu’hai unos homes, iguales ante’l dolor y ante la muerte. ¡Guerra
a la guerra! ¡Abaxo la guerra! ¿Ye qu’esos millones de cadarmes ensin
nome, perdíes na prieta fondura de lo desconocío nun son abondes pa
llevantar pa siempre la paz universal?... Homes nuevos, homes del sieglu
XXI, ¿nun llegó yá la hora de tar de vuelta de tanta maldá, de tanta
probitú y de tanta fame bestial?...
Yo dígovoslo, asegúrovoslo pola paz: Yo nun diré a la guerra.
Yo toi, ¡en pie de paz!
Nesti cursu que tanto se faló de la guerra a los alumnos de Llingua
Asturiana de Primeru de la E.S.O. présta-yos dar la so opinión con esta
torna: Tamara, Fani, Eli, Xuan, Carlos, Antón, Iván y Xosué.
L’ artículu orixinal pertenez a Mario de la Viña, escritor nacíu en
Xixón en 1910 y muertu en París, nel esiliu, en 1990. Foi espublizáu
enantes de que l’autor sufriera nueve años de guerra: la cabera habida
n’España y la segunda nomada mundial.
|
